Lifi byltingin

Fór til Eyjunnar í dag - fann hana ekki. En hún ku vera í sama húsi og Kristján bankastjóri í Verslunarbankanum heitnum sagði mér að bankaviðskipti byggðust upp á gagnkvæmu trausti og til að fá víxil (1978) væri rétt af mér að stofna reikning í bankanum fyrst.

Á gangstéttinni fyrir utan hitti ég duglegan bloggara og skólamanneskju. Það var gaman að þeim hitting því við höfum fylgst með hvort öðru í gegnum bloggið og gátum rætt pólitískar aksjónir hvors annars án mikilla formála. Við vorum sammála um hvað nýir tímar í fjölmiðlun með tilkomu netsins væru skemmtilegir, því umræðan strandar ekki lengur á vilja einstakra ritstjóra til að taka málefnin á dagskrá. Lýðurinn ræður, sem er hið besta lýðræði.

Fór heim og las póst frá einum ágætum bloggara sem hefur skrifað ítarlega um sama málefni og ég var að skrifa um seinast. Hann sagði;

“Það skyldi þó aldrei verða að bloggarar þessa lands verði marktækastir fréttamiðlara. Rannsóknarblaðamennskan er dauð og þar liggur sóknarfæri hjá bloggurum…”

Það er einmitt þetta sem er svo gaman hugsaði ég. Á Eyjunni t.d. er að finna alveg nýja heildarhugmynd. Þar sem tínt er saman efni úr hefðbundnum fréttamiðlum og frá fólki sem hefur sérstaka innsýn í einstök málefni, hefur sérstakan athuga á þeim, eða er sérstaklega ritfært eða með góðan húmor. Þetta er einstök lýðræðisleg blanda sem var ekki möguleg fyrir nokkrum misserum. Ný heildarhugmynd í fjölmiðlun.

Dæmi um hina lýðræðislegu breytingu:
Ég hef ekki oft skrifað greinar í Mogga en seinast þegar ég gerði það beið textinn minn í þrjá mánuði inni á ritstjórninni. Í dag smelli ég á einn hnapp og textinn er útgefinn.

Dæmi um hina öru tækniþróun: Leiðréttingarforritið í tölvunni minni skilur ekki orðið blogg.

Svona hugsaði ég og var bara orðið mikið niðri fyrir í lok þessa góða dags þegar ég las það að sá sem hefur leitt þessa byltingu á Eyjunni er hættur á vaktinni. Það gleður mig ekkert rosalega.

Ég hef átt gott samstarf við Pétur Gunnarsson og mun leggja sitthvað á mig til að geta átt það áfram. Hallgrími Thorst óska ég til hamingju með nýja starfið, sem er mikils virði.

Lifi byltingin.

Innri Endurskoðun ekki óháð Jórunni

Fyrir mörgum árum voru þokkapiltar sem kjörnir voru til að stýra einhverju nemendafélagi eða málfundafélagi í MR uppvísir að því að hafa tekið drjúgt af félagsgjöldum í allskonar einkaneyslu. Talið var að þeir hafi snætt og drukkið á dýrustu veitingahúsum og ekið á limmósínum til skemmtana skólans á kostnað félaga sinna.

Gustur varð í fjölmiðlum í nokkra daga, en svo kom yfirlýsing frá virtu endurskoðunarfirma félagsins um að ekkert væri athugavert við bókhald félagsins sem þokkapiltarnir stýrðu. Syndaaflausn var fengin. Ekki var um fjárdrátt að ræða því allt var skilvíslega fært til bókar og jafnvel stóðu stjórnarsamþykktir að baki bruðlinu. Málinu var lokið, en gjörðir piltanna voru líklega jafn siðlausar eftir sem áður. Því stundum er hægt að fara að lögum en vera siðlaus.

Undanfarið hefur borgarstjórnarmeirihlutinn í Reykjavík legið undir ámæli fyrir að bruðla með fé borgaranna þegar óhagstæðasta tilboði var tekið í rekstur áfangahúsnæðis fyrir langt gengna vímuefnafíkla, aðallega alkahólista. Ákvarðanir um að taka óhagstæðasta tilboðinu voru teknar af Velferðarráði sem er undir forystu Jórunnar Frímannsdóttur borgarfulltrúa sjálfstæðismanna og hjúkrunarfræðings. Sumir hafa dregið hæfi Jórunnar í efa og jafnvel talið hana vanhæfa. Sumir hafa jafnvel gengið svo langt að saka mig um spillingu sagði Jórunn í útvarpinu í Vikulokin í gær.

Jórunn hefur varist fjálglega, dregið í efa að málshefjandi í “þessum ósanngjarna áróðri vinstrimanna gegn sér” borgarfulltrúinn Þorleifur Gunnlaugsson, haft rétt til að gera athugasemdir við ráðslagið af því hann sat eitt sinn í stjórn SÁÁ. Hún vísar því á bug að ástæða sé til að efast um að verkkaupi geti lagt til það húsnæði sem samið var um því hann haf lagt fram bréf í borgarráði á fimmtudag. Óháð matsfyrirtæki telur þó miklar líkur á því að húseigandinn sé að verða gjaldþrota. Sterkasta vörn Jórunnar er að vísa í álit Innri Endurskoðunar Reykjavíkurborgar, sem segi allt samkvæmt settum reglum.

Við höfum tilhneigingu til að taka mark á enurskoðurum. Undanfarna tvo áratugi höfum við séð fjölmargar úttektir frá óháðri eftirlitsstofnun sem heitir Ríkisendurskoðun. Oft hafa úttektir Ríkisendurskoðunar komið ráðherrum og bitlingapólitíkusum illa en það hefur ekki haft áhrif á niðurstöður stofnunarinnar af því stofnunin er óháð, heyrir ekki undir neitt ráðuneyti, heldur beint undir Alþingi. Um Ríkisendurskoðun gilda sérstök lög og fúllyndir ráðherra hafa ekki tök á því að ógna starfsmönnum þar og ögra eins og aðrir hafa þurft að búa við. Þetta frelsi Ríkisendurskoðunar og þau vönduðu vinnubrögð sem þar hafa verið tíðkuð skapa traust á stofnuninni.

Það er því ekki að ástæðulausu sem það hljómar vel þegar Jórunn Frímannsdóttir hampar áliti Innri Endurskoðunar Reykjavíkurborgar. En hvað er Innri Endurskoðun Reykjavíkur? Sú stofnun eða öllu heldur deild er hópur starfsmanna sem heyra beint undir borgarstjóra, borgarráð og borgarstjórn. Deildin er sett á stofn til að meta starfsemi stofnana borgarinnar en er ekki ætlað að leggja hlutlaust mat á störf borgarfulltrúa sem starfsmenn deildarinnar heyra undir.

Þetta má glögglega sjá ef skoðaðar eru upplýsingar um deildina á vef Reykjavíkur og einnig ef skoðað er skipurit sem þar fylgir. Þar segir:

“Innri endurskoðun er starfsemi sem veitir óháða og hlutlæga staðfestingu og ráðgjöf sem er ætlað að vera virðisaukandi og bæta rekstur fyrirtækja og stofnana. Innri endurskoðun leggur mat á og bætir virkni áhættustýringar, eftirlitsaðferða og stjórnarhátta með kerfisbundnum og öguðum vinnubrögðum og styður þannig viðkomandi fyrirtæki eða stofnun í því að ná markmiðum sínum.”

Þarna er auðvitað ekki stafur um að Endurskoðunin meti ákvarðanir pólitískra ráða sem yfirmenn Endurskoðunarinnar stýra.

Með þessu er ég ekki að draga í efa vönduð vinnubrögð innan Innri Endurskoðunar Reykjavíkur. Þar starfar örugglega hið mætasta fólk, sem ekki má vamm sitt vita frekar en kollegar þeirra á Ríkisendurskoðun, en staða þeirra er allt önnur og Innri Endurskoðun Reykjavíkur gefur auðvitað ekki út syndaaflausn fyrir yfirmann sinn Jórunni Frímannsdóttur.

Mestu máli skiptir að þeir illa stöddu einstaklingar sem þurfa þak yfir höfuðið og hjálp við að fóta sig í tilverunni fái þessa aðstoð strax. Þetta eru meðal annars einstaklingar sem komust í kröggur þegar hin alræmda starfsemi Byrgisins var lögð af. Ekki var vel að verki staðið þegar Byrginu var komið á fót. Eina niðurstaða stjórnmálamanna af þeim skandali var að læra skyldi af mistökunum.

Eini lærdómurinn sem nú hefur verið dreginn er sá, að öngla saman tugum miljóna frá Félagsmálaráðuneyti og Reykjavíkurborg og koma þeim í hendurnar á þeim sem gerði hæsta tilboðið í starfsemina, með mjög hæpnum rökum. Sérstaka athygli vekja þau rök að vegna þess að sá tilboðsgjafi sem samið var við rekur ekki meðferð sé hann betur til þess fallinn að eiga samstarf við tilboðsgjafann sem rekur meðferð, heldur en tilboðsgjafinn sem meðferð rekur.

"Velferðarsvið taldi það einnig skipta máli að með því að velja aðila sem ekki rekur meðferðarstofnun megi ætla að auðveldara verði að nýta meðferðarúrræði þeirra aðila sem það gera..."

Gegn svona þversögn duga engin aflátsbréf frá endurskoðendum. Dómur yfir Jórunni og félögum hennar í borgarstjórnarmeirihluta Reykjavíkur verður felldur í kosningum til sveitarstjórna eftir rétt tæplega tvö ár. Velur þá hver fyrir sig.

Hásumarfegurð heimsins

Þvó rúður í morgun. Við sáum heiminn í nýju ljósi eftir það.

Prinsessan þriggja ára hvatti pabba sinn til að stíga á vogina í kvöld þegar þau áttu leið framhjá henni.

“Vááá pabbi þú hefur stækkað svona mikið. Mikið ertu duglegur!”

Einhvernvegin hljómaði þessi frasi ekki sem hrós í eyrum pabbans, þó hann gleðji prinsessuna alltaf. Stundum hittir maður sjálfan sig fyrir.

Nú er fegurð heimsins sofnuð í rúminu hans pabba síns og sumarnóttin leggur drög að nýjum morgni. Okkar bíða nokkrar rúður til viðbótar.

Hér eru tónverk dagsins:




MTV from James Houston on Vimeo.

Fær í eyjum - að láta verkin tala

Loks þegar borgarstjóri fer í opinbera heimsókn hlýst af því óvæntur og mikill menningarhagvöxtur, þó ekki sé farið lengra út fyrir landsteinana en til Færeyja.

Nú þarf ég að fá að heyra þetta, eða sjá þetta viðtal við Sölvu Ford sem Kringvarp Föreyja kynnir svo:

“Sølva Ford sigur frá sínum truplu tannárum. Tvær reisur var hon gift. Lívið var ikki einfalt og hon var í ráðaloysi, til hon ein dag kom eftir, at Guð kundi hjálpa.”

Fram að því hlusta ég á Sölvu syngja um að loksins sé hún frjás. Ég hlakka sannarlega til menningarnætur.

Læt það vera að peista inn þessari mynd, þó flott sé.

Nú má trekkja upp miðborgarstjórann Kobba og láta hann segja eitthvað uppskrúfað a borð við:

“Fær í eyjum flest á sjóvi Sølvu. Þetta var semsagt ekki sneypuför til Færeyja gjörð, þarna eru verkin látin tala”

Einkavinavæðing

Nú á að einkavæða Droplaugarstaði og e.t.v. fleiri hjúkrunarheimili fyrir aldraða. Hver ætli hreppi reksturinn? Jórunni Frímannsdóttur og félögum hennar í borgarstjórn er örugglega treystandi til að koma “réttum” aðilum í reksturinn.

Í fundargerð Leikskólaráðs er eftirfarandi bókun frá Samfylkingu og VG:

“Á vef Leikskólasviðs er auglýst eftir áhugasömum aðilum til að reka ungbarnaskóla undir formerkjum heilsustefnu. Þar er gert ráð fyrir að skólinn verði sjálfstætt starfandi en njóti rekstrarstyrkja frá borginni. Í upphaflegri auglýsingu birtist slóð á fyrirtæki sem sérhæfir sig í slíkum rekstri”

Skrítið?

Frægt er orðið hvernig hagstæðasta tilboð um heimili fyrir vímuefnafíkla var hundsað og komið í hendur réttrar klíku. Um þann gjörning má lesa góða samantekt hér.

Þegar gerðar eru athugasemdir við þetta ráðslag kallar sjálfgræðismaðurinn Jórunn Frímannsdóttir þær læti eða röfl.


Fylgjumst nú vel með Droplaugarstöðum og Jórunni.

Verkefni

Hvað heitir hann aftur hópurinn sem stóð að “Frelsum Fisser” og “Aron Pálma í bæinn” átökunum?

Hér er verkefni fyrir þennan hóp.

Boy George til Íslands!

Ólafshús er æði gott

Ókum Þverárfjallsveg á leið niður á Krók í gær. Á þessum slóðum hafa hvítir litir í umhverfinu öðlast nýja athygli og merkingu. Og mikið er mikið af þeim. Var þetta kind? Er þetta áburðarpoki? Er e´tta snjór? Var þetta hross? Að minnsta kosti komumst við klakklaust og óétin niður á Krók.

Á Króknum var tekin pizza í veitingastaðnum Ólafshúsi. Hvílíkur metnaður. Ég hef ekki bragðað betri pizzu um dagana. Allir pizzasalar sunnanlands falla í skuggann. Nú get ég loksins haft skilning á hví fólk vil hafa fasta búsetu á Króknum.

Kannski það sé þess virði að koma við á veitingastaðnum Sauðaþjófnum á Blönduósi í bakaleiðinni.

það sem ekki má tala um

Þegar núverandi borgarstjórnarmeirhluti var myndaður vildu fréttamenn spyrja Ólaf F. Magnússon um heilsufar sitt, verðandi borgarstjóra fannst það óviðeigandi spurning og neitaði að svara. Þetta fundust mörgum skrítin viðbrögð og þau voru Ólafi örugglega ekki til framdráttar.

En nú er svo að sjá að Sjálfstæðismenn hafi lært ýmislegt af þessum nána samstarfsmanni sínum. Dæmi:

Forsætisráðherra finnst það óviðeigandi að tjá sig um þátt sinn í að Vilhjálmur fór úr forystuhlutverki í borginni og Hanna tekur við. Og raunar fannst honum það dónaskapur í febrúar að vera spurður um þessi mál af fréttamönnum Vísis.

Þegar formaður næststærsta stjórnmálaflokks þjóðarinnar tjáir sig um niðurstöðu Baugsmaálsins rís Sigurður Kári sendisveinn þingflokks Sjálfstæðismanna upp á afturfætur og andæfir.

Þegar formaður fjárlaganefndar tjáir sig um að líklega þurfi að draga saman seglin í næstu fjárlögum, gæta aðhalds og e.t.v. fresta byggingu hátækniháskólasjúkrahúss, bregst heilbrigðisráðherrann pirraður við og segir það óviðeigandi að tjá sig um væntanleg fjárlög.

Þegar Hanna oddviti heldur fagnaðarfund með sínu fólki í gær segir hún að það sé bannað að tjá sig um persónu borgarstjóra og talar um að allar reglur stjórnmálanna hafi verið brotnar.

Þegar forsætisráðherra er spurður að því hvar peningarnir séu sem koma áttu inn í landið, finnst honum það dónaleg framkoma af því fréttamaður hafði ekki pantað tíma með formlegum hætti til að leggja fram þessa spurningu.

Það er ekki nema von að Hanna segi að samstarf Sjálfstæðismanna við Ólaf F. sé gott og traust.

Heilagt stríð

Af Magga, Snorra og Tobba

Ég hitti Magga kokk í gær og skömmu síðar Snorra Ingason. Fimm mínútum seinna hitti ég Tobba, (sem ku heita Þorbjörn Gestsson í raun og veru). Ég hitti Magga oft en hina hef ég ekki hitt árum saman. Þeir voru allir mínir bestu vinir í barnaskóla, í bekk Tómasar Einarssonar í Hliðarskóla.

Snorri átti systurnar Sæunni og Lottu. Lotta var eldri en við og kunni atómljóð. Mér fannst það smart. Eitt var svona:

Haltu niðri í þér andanum þanga til ég segi stopp sagði konan við manninn sinn þegar hann kom inn úr dyrunum. Maðurinn hélt niðri í sér andanum þar til hann dó, því konan gelymdi að segja stopp.

Tobbi átti bæði yngri og eldri systkini en ég man ekki eftir neinu ljóðlegu við þau, en einhverjar sagnir voru um að þegar hljómsveitin Slade kom til landsins 1974 og spilaði fyrir okkur í Laugardalshöll, sælla minninga, hafi stóra systir hans komist nær þeim Dave Hill og Noddy Holder inni á Hótel Esju en okkur strákunum lánaðist.

Maggi átti líka bróður og systur. Sæli bróðir hlustaði á Yes en Dóra litla systir fór í M.H. og umgegst listafólk og var örugglega sjálf lista- eitthvað áður en hún lærði almannatengsl.

Magnús sjálfur er veitingamaður á Sjávarbarnum og hefur alltaf þurft að hafa listamenn innan seilingar við starfsemi sína, hvar svo sem hann hefur haft rekstur sinn.

Nú er hinn huggulegi Sjávarbar hans á Grandanum búinn að gefa út listaverkabók. Og hafið… heitir hún en þar rugla þeir reitum sínum Einar Már í ljóðum og Tolli í myndum. Myndir Tolla eru skreyttar ljóðum Einars frá ýmsum tímum, en öll tengjast þau hafinu.

Hér er upphafið að Ræðupúlti örlaganna, sem á nokkuð vel við þessa dagana:

Ekki tala um
stórar þjóðir og litlar þjóðir,
útkjálka, heimshorn og jaðra.

Þetta er hnöttur; og miðjan
sem hvílir undir iljum þínum
breytist við hvert fótspor.

…

Hér er landið
þar sem heimsálfurnar skrifast á
í leit sinni að þögn og grjóti.

Sjáðu jökulinn,
hvernig hann vappar um blámann
einsog ísbjörn á leið yfir heiminn.



Því má svo bæta við að Tobbi er nú vélstjóri í Hafnarfjörður City og Snorri er sölustjóri hjá Forlaginu (en ef ég skil hann rétt felast í því hans forlög). Ég geri fastlega ráð fyrir að hitta Steina Sig og Bidda á morgun.

Ofjarl IPhone

Nú hefur verið kynntur sími sem toppar IPhone símann frá Apple. Það er sími sem er búinn öllum kostum IPhone og mörgum til viðbótar t.d. 3G sambandi.

Það var enginn annar en Steve Jobs forstjóri Apple og átrúnaðargoð okkar sumra sem kynnti í dag síma sem heitir Iphone 3G

Síminn sem er sagður tvöfalt hraðvirkar og vera á hálfvirði miðað við fyrirrennar sinn mun aðeins kosta $ 199 þegar hann kemur á markað í 70 löndum í júli. Ísland er ekki eitt af þeim löndum þar sem síminn verður á markaði en það mun ekki stoppa okkur!!!

Sjá nánar hér og ekki síður hér.

Formannarugl-ingur

Hugmyndir Gunnars Svavarssonar formanns Fjárlaganefndar um að fresta byggingu nýs háskólasjúkrahúss vekja harkaleg viðbrögð hjá heilbrigðisráðherra. Skiptir þá engu þó varaformaður nefndarinnar og flokksbróðir ráðherrans, Kristján Þór Júlíusson, leggi áherslu á að skera þurfi verulega niður.

Í fréttum Stöðvar tvö í kvöld var svo talaða við Kristján Þór sem þá var orðinn formaður Fjárlaganefndarinnar.

Annað hvort veit Heimir Már Pétursson fréttamaður og fyrrverandi frambjóðandi Samfylkingarinnar ekki hver er formaður Fjárlaganefndar, eða formaðurinn hefur fallið frá í dag.

Það kemur mér reyndar verulega á óvart ef Gunnar er ekki lengur á meðal vor og enginn hefur látið mig vita af því.

Björninn og heljarmennið

Guðmundur mágur minn var heljarmenni. Einhverju sinni erum við á ferð norður á sléttu, búnir að ganga dagpart og orðnir lerkaðir. Allt í einu veit ég ekki fyrr til en gríðarstór ísbjörn rís upp á afturfæturna beint fyrir framan okkur.

Guðmunur mágur minn var heljarmenni og þegar ísbjörninn lét ófriðlega óð Guðmundur í hann. Skiptir þá engum togum nema björninn sveiflar hramminum fellir Guðmund og rífur vinstri handlegg hans af um axlir.

En Guðmundur mágur minn var heljarmenni og stendur þegar í stað upp og æðir í ísbjörninn einhentur. Skiptir þá engum togum, nema hvað að ísbjörninn fellir hann aftur, sveiflar ógnarstórum hramminum og rífur hægri handlegg Guðmundar af um axlir.

Guðmundur mágur minn var heljarmenni og þar sem hann lá á hjarninu, handalaus í blóði sínu segir hann. “Hörður minn – Hörður minn – þú mátt bara eiga vettlingana mína”

Staðan

Álver rís og miklar líkur á olíuhreinsistöð á vestfjörðum. Svona er Ísland í dag.

Forskot

Ég tók 478 ljósmyndir í vinnunni í dag.
Þær verða til sýnis á morgun á sérstakri hátíð.
Hér eru fjórar af þeim – forskot á sæluna.

Staðan

Drepum hvali, skjótum ísbjörn, svona er Ísland í dag.

Safnað fyrir munaðarlaus börn í Kína

Nú er talið að um sötíu þúsund manns hafi látið lífið í jarðskjálftunum í Kína. Fjöldi barna missti foreldra sína og fjöldi barnaheimila munaðarlausra hrundi til grunna eða laskaðist.

Félagið Íslensk Ættleiðing hefur sent frá sér tilkyningu af þessu tilefni:

"Í ljósi hörmunganna í Kína vill fjáröflunarnefnd ÍÆ hvetja félagsmenn til að leggja inn á söfnunarreikning Íslenskrar ættleiðingar núna í vikunni því ætlunin er að senda peningaaðstoð í næstu viku til CCAA, kínversku ættleiðingarmiðstöðvarinnar. Þúsund kallinn gæti skipt sköpum!

CCAA hefur yfirumsjón með öllum barnaheimilum í Kína og á hamfarasvæðinu þarf að byggja skýli fyrir þau börn sem hafa misst foreldra sína, veita þeim fæði og klæði og finna heimili til að taka við þeim á meðan verið er finna aðrar lausnir.

Reikningsnúmerið er 525-14-604666 - kt. 531187-2539, allir peningar sem koma inn renna óskiptir til velferðarverkefna á vegum CCAA."